نئی دہلی،18/اکتوبر(ایس او نیوز/ایجنسی) ڈیرہ سچا سودا کے سربراہ گرمیت رام رحیم کو آج سپریم کورٹ سے ایک اور بڑا دھچکا لگا ہے۔ عدالتِ عظمیٰ نے گرو گرنتھ صاحب کی بے ادبی کے معاملے میں پنجاب اور ہریانہ ہائی کورٹ کی طرف سے عائد پابندی کو ختم کر دیا ہے۔ گرمیت رام رحیم پر الزام ہے کہ وہ مذہبی متن کی بے حرمتی میں ملوث رہے ہیں، جس کے تحت ان کے خلاف مقدمہ چلانے کا حکم دیا گیا ہے۔

پنجاب اور ہریانہ ہائی کورٹ نے مارچ 2024 میں رام رحیم کے خلاف جاری تحقیقات پر روک لگا دی تھی، جسے پنجاب حکومت نے سپریم کورٹ میں چیلنج کیا تھا۔ آج کی سماعت کے دوران، سپریم کورٹ نے ہائی کورٹ کے فیصلے کو منسوخ کر دیا اور رام رحیم کو نوٹس جاری کر دیا۔ انہیں چار ہفتے کے اندر جواب دینا ہوگا۔ اب اس فیصلے کے بعد، نچلی عدالت میں رام رحیم کے خلاف مقدمہ شروع کیا جا سکے گا۔

یہ معاملہ 2015 کا ہے، جب پنجاب پولیس نے مذہبی متن کی بے ادبی کے کیس میں اپنی حتمی تحقیقات کی رپورٹ پیش کی تھی۔ رپورٹ میں ڈیرہ سچا سودا کو ان واقعات کا ذمہ دار ٹھہرایا گیا تھا۔ 2015 میں فریدکوٹ میں گرو گرنتھ صاحب کی ایک 'بیر' (نقل) چوری ہونے کے بعد بے ادبی سے متعلق تحریری پوسٹرز اور گرو گرنتھ کے پھٹے ہوئے صفحات بھی ملے تھے۔ ان واقعات کی وجہ سے فریدکوٹ میں بڑے پیمانے پر مظاہرے ہوئے تھے۔

اکتوبر 2015 میں، مظاہرین پر پولیس کی فائرنگ ہوئی جس میں بہہ بل کلان میں دو افراد کی جان گئی تھی، جبکہ فریدکوٹ کے کوٹ کپورا میں کئی لوگ زخمی ہوئے تھے۔ اس دوران، ڈیرہ کے سربراہ گرمیت رام رحیم کو بے ادبی کی 3 مختلف واقعات میں نامزد کیا گیا تھا۔ رپورٹ میں یہ بھی کہا گیا ہے کہ ان تین واقعات کا ’ڈیرہ سچا سودہ سے براہ راست تعلق ہے‘ اور ان میں شامل ملزمان اسی ڈیرے کے پیروکار ہیں۔